كمل جميلك
وإحكمنا
وبالبيادة أفرمنا
ميهمكش مظاهرات
ولاإعتراض أقليات
وإن قالولك فين يناير
قولهم يونية الأهم
شهر نكسة وشهر وكسة
بس بكرة تشوفوا مصر
كمل جميلك
الخير في إيدك غرقنا
والشحاتين دخلوا الجنة
والشهيد ملوهش دية
والبلطجية محاوطنا
كمل جميلك وأحكمنا
كمل جميلك
ثورة إيه ياعم سيبك
دول عيال فرافير في إيدك
حظر تجول علي طوارئ
وخراب ديار بالمليارات
يرجع الولد اللي شارد
واللي مش عاجبه نطخه
كام عيار بمسدسات
وقول عليهم مجرمين
حثالة عاشقين للإرهاب
هيصدقوك ويعملولك
ألف حساب ويعظمولك
كمل جميلك
وفي سينا دمر أبنائك
شرد وأطرد أوغادك
وخلي أجهزة الإعلام
تنبح بصوتك وتهلل
وحبة دموع علي الشهيد
اللي بيموت عالحدود
علي فيلم هندي وتفجيرات
تضمن ولاء كل الكلاب
كمل جميلك
غير عقيدتك في المليان
وجه سهامك للأوطان
فخخ عيالك بالديناميت
وانشر في كل الإعلام
أنك بتحمي الأوطان
هتلاقي هبل كتير في صفك
واللي يزفك واللي يرقصلك
ماهو سيرك مكتمل الأركان
كمل جميلك
أوعي تتراجع ياباشا
سحر البيادة ميترفضش
علي رأي عمي أخو أبويا
لو فاتك الميري إتمرمغ
في ترابه يمكن يسمحلك
تلحس في الجزمة وتتنطق
اراجوز فضائي أو مخبر
وتاخد وسام زي اللئام
وعربية جامدة أخر موديل
وظرف محشور إإئتمان
حساب هناك وحساب هنا
ومش مهم ربنا
المهم التمام
كمل جميلك
لاتاريخ يهمك ولاعبرة تاخد
من اللي قبلك أو حتي بعدك
فكر في سحر كرسي خازوق
مريح وفاره وعرش زائل
وقصر ملكي وحرس ببوق
بس الشطارة أنك تأجل
قدر محاوطك وحساب قريب
إن مكانش في دنيا فانية
عند ربك فيه حدود
وكل مهلة متتخدعش
ده فخ جبار مش هزار
أفرح قليل مش كتير
بس خاف مالمستخبي
واللي جاي أو معدي
واللي لابد في السكات
كمل جميلك
ليست هناك تعليقات:
إرسال تعليق