·
قرب قرب.. عندك واحد وطن للبيع ..عمره ألاف السنيين..مر عليه إحتلال
وإستغلال.. نهب وسرقة ومع كل ده لساه غني.. مليان ذهب ..مرجان وياقوت ولامغارة علي
بابا.. مهما غرفت مبيخلصش ..ومهما ضربت فيه مبيهمدش .. المساحة مذهلة.. الخير
كتير.. واللي مايشتري ممكن يتفرج.. قرب قرب..
·
عندك واحد وطن للبيع.. ان خرب بيت أبوك إلحق خدلك منه قالب ..وإن قامت ثورة
إلحق أركبلك قارب ..وجدف ويا التيار.. إخطف وإطلع علي كل الشاشات ..بس مهم ترفع
راسك فوق وتجرب.. شرق غرب..كسر.. خرب.. ومتقلقش.. قرب قرب
·
وطن للبيع.. بيطل علي نيل وبحر كبير..مفروش وتمليك وكمان إيجار.. حق
الإستغلال دايما مفتوح.. وحق البلطجة أكيد مشروع..واللي يلاقي حاجة ياخدها ..
ناس.. فلوس.. أحلام.. أوهام.. كله مباح وكله تمام..وكله مهرب.. عاوز تيجي تجرب..
أوعي تخاف وقرب قرب
·
وطن علي الخريطة مفندق..عمره مكان محندق.. مبيقولش لأ..ويوم ماينطق ويقوم
بثورة ماتخافش منه.. شوية فتن علي كام مؤامرة وحبة فلول وشعار مفبرك..مع كام دولار
وكام ريال وكام دينار..يرجع تمام.. تايه وضايع وكمان مشتت.. اوعاك تخاف وتعالي
جرب.. قرب قرب
·
محروسة كانت.. مفروسة عانت..مسلوبة هانت..صابرة ولسة علي الجار السو..
واللي بيحتل.. عقلها ورموشها.. لجل مايمنع عنها الضل..ويسقيها الذل.. ويحول ناسها
لوحوش مليانة قلوبها بغل..ويشعلل نار بين أولادها.. مسيحي ومسلم.. شعب وجيش.. شرطة
وناس.. والكل مداس في رجل فلول وبقايا أندال.. وحبة مرتزقة..قرب قرب
·
مصر تباع قرب قرب..اللي يدفع أكتر يكسب.. في الإنتخابات او في
الفضائيات..في التحرير أو في دمياط.. قرب قرب.. عندنا أحزاب وكمان
جماعات..وإئئتلافات.. ومليونيات.. وببغاوات.. وموتوسيكلات.. بلطجية وفيس بوكات..
وأبوك السقا مات..ورئيس مخلوع.. محمي ومدلل.. قرب قرب
·
بلدنا في أزمة.. قرب قرب..فتح مخك وأوعي تجرب تترك عقلك للأوغاد والحساد
وبتوع التلت ورقات .. مصر بتغرق وإحنا بنتفرج..وطننا علي أبواب تقسيم.. وحرب بين
الأخ وأخوه.. وعدو رسم خريطته زمان ..وبتتحقق.. ولجل ماتكمل خطة أمس يبقي الدور
علي مصر وسوريا ثم إيران..قرب قرب وأوعي تجرب غير الحكمة..وكشف الملعب.. قبل
ماتعلب يسرق حلمك.. أوعي تقرب.. اوعي تقرب!!
هشام لاشين heshamlasheen@yahoo.com
